Uttarayan Special Chikki: ઉત્તરાયણ (Makar Sankranti) નજીક આવી રહી છે અને ગુજરાતના આકાશમાં પતંગોની સાથે સાથે ઘરોમાં ચીક્કીની સુગંધ પણ મહેકવા લાગી છે. બજારમાં તો અનેક પ્રકારની ચીક્કી મળે છે, પણ ઘરે બનાવેલી શુદ્ધ અને કુરકુરી ચીક્કીની વાત જ કંઈક અલગ છે.
ઘણીવાર બહેનોને ફરિયાદ હોય છે કે ચીક્કી કાં તો પોચી રહી જાય છે અથવા તો દાંતમાં ચોંટે છે. આજે હું, ક્રિશા, તમારી સાથે શેર કરીશ ગોળના પાયાની સાચી રીત જેથી તમારી ચીક્કી એકદમ બજાર જેવી જ ક્રિસ્પી બનશે.
તલ અને સીંગની ચીક્કી માટેની સામગ્રી (Ingredients)
- તલ (સફેદ): ૧ કપ
- સીંગદાણા: ૧ કપ (શેકેલા અને ફોતરા કાઢેલા)
- ગોળ: ૧.૫ થી ૨ કપ (ઝીણો સમારેલો, શક્ય હોય તો ચીક્કીનો સ્પેશિયલ ગોળ વાપરવો)
- ઘી: ૧ મોટી ચમચી
- પાણી: ૧ ચમચી
સ્ટેપ-બાય-સ્ટેપ ચીક્કી બનાવવાની રીત
૧. તલ અને સીંગ તૈયાર કરવા
સૌ પ્રથમ તલને ધીમા તાપે કઢાઈમાં શેકી લો જ્યાં સુધી તે થોડા ફૂલે અને આછો ગુલાબી રંગ આવે. તેવી જ રીતે સીંગદાણાને શેકી, ફોતરા કાઢી તેના બે ટુકડા કરી લો. ચીક્કી બનાવતા પહેલા આ બંને વસ્તુ તૈયાર રાખવી ખૂબ જરૂરી છે.
૨. ગોળનો પાયો તૈયાર કરવો (સૌથી મહત્વનો ભાગ)
એક જાડા તળિયાવાળી કઢાઈમાં ૧ ચમચી ઘી અને ઝીણો સમારેલો ગોળ ઉમેરો. તેમાં ૧ ચમચી પાણી નાખો. ધીમા તાપે ગોળને ઓગળવા દો. જ્યારે ગોળમાં ફીણ થવા લાગે અને તેનો રંગ થોડો બદલાય, ત્યારે પાયો ચેક કરવો.
પાયો ચેક કરવાની રીત: એક વાટકીમાં ઠંડુ પાણી લો અને તેમાં ગોળના બે-ત્રણ ટીપાં નાખો. થોડી સેકન્ડ પછી તે ટીપાંને તોડી જુઓ. જો તે ‘કટ’ અવાજ સાથે તૂટી જાય, તો સમજવું કે પાયો તૈયાર છે. જો તે ખેંચાય, તો હજુ ૧ મિનિટ વધુ પકવો.
૩. મિશ્રણ તૈયાર કરવું
પાયો તૈયાર થઈ જાય એટલે તરત જ ગેસ બંધ કરી દો. તેમાં શેકેલા તલ અને સીંગદાણા ઉમેરી ઝડપથી મિક્સ કરો. આ સમયે તમારે સ્ફૂર્તિ રાખવી પડશે કારણ કે ગોળ જલ્દી જામી જાય છે.
૪. ચીક્કી વણવી
એક પ્લેટફોર્મ અથવા આદણી પર ઘી લગાવો. તેના પર તૈયાર મિશ્રણ મૂકો. વેલણ પર પણ થોડું ઘી લગાવી તેને ગરમાગરમ જ વણી લો. તમારે જેટલી પાતળી ચીક્કી જોઈએ તેટલી વણી શકાય છે.
૫. કાપા પાડવા
ચીક્કી હજુ ગરમ હોય ત્યારે જ ચપ્પુ વડે તેમાં ચોરસ કાપા પાડી લો. ઠંડી થયા પછી તેમાં કાપા પાડવા મુશ્કેલ બનશે. ૧૦-૧૫ મિનિટ પછી ચીક્કી બરાબર ઠરી જાય એટલે તેના ટુકડા અલગ કરી લો.
કુરકુરી ચીક્કી માટે ક્રિશાની ખાસ ટિપ્સ (Secret Tips)
૧. ગોળની પસંદગી: બને ત્યાં સુધી ચીક્કી માટેનો ખાસ લાલ/કાળો ગોળ વાપરવો, તેનાથી ટેક્સચર સારું આવે છે.
૨. ધીમો તાપ: આખી પ્રોસેસ દરમિયાન ગેસની આંચ ધીમી જ રાખવી, નહીંતર ગોળ બળી જશે અને ચીક્કી કડવી લાગશે.
૩. ચમક: પાયામાં ઘી ઉમેરવાથી ચીક્કીમાં બજાર જેવી જ સરસ ચમક આવે છે.